Бавлинский МР. Баулы районы Исергәп авылында бик матур чара узды.
Исергәптә танылган якташыбыз, гаҗәеп талантлы шәхес Вахит Юнысовның тууына 95 ел тулуга багышланган җылы һәм эчтәлекле кичә узды. Чара авыл район китапханәләр системасы тарафыннан мәктәп белән берлектә оештырылды.
Исергәптә туып-үскән Вахит Закир улы Юнысов – күп еллар СССРның чит илләр белән сәүдә министрлыгында, Гыйрак, Мисыр, Әфганстан, Сирия кебек илләрдәге илчелекләрендә хезмәт итә; язучы, Мәскәү татар милли-мәдәни автономиясенең «Татарские новости» газетасында баш мөхәррир урынбасары була. Язучы Миргазиян Юнысның энесе, җырчы Тимур Юнысовның бабасы.
Кичә барышында Вахит Юнысовның биографиясеннән кызыклы фактлар китерелде. Авылдашлары – публицист Зәрия Хәбипова һәм мәгариф өлкәсе ветераны Рәзинә Шараева, Баулы китапханәләр системасы директоры урынбасары Фәридә Зыярова язучы турында истәлекләре белән уртаклаштылар.
Искә алу кичәсе авылның моңлы ханымнары җырлары белән бизәлде.